reflections

hmm....

Heey...

D pizzaparty isch suuper gsii...sind no anderii ustuschschueler doert gsii und 2 sind us duetschland und 2 us brasilie...und denn no ein us japan und finnland, russland usw...
ha mega lang mit de brasilianer gredet und bi froh gsii wieder mol choenne e normalii sproch z rede...^^

in dr schuel hemer s zmorgeesse mit em spanishclub kha was au witzig gsii isch...und doert han i au d duetschlehrerin kenneglernt und si cha mega guet duetsch und het denn au gfunde meh merkt nid das ich us dr schwiiz bii...=)
Mir hend doert denn alli natelnr ustueschlet und gang wohrschinli au mit es paarne vom spanischclub zum homecomingdance..
de isch scho de samschtig und i ha immer no kei kleid bi am fritig binere kollegin gsii abr all ihri kleider sind mir z gross gsii odr eifach z lang...und morn gang i mol go shoppe und lueg oeb i es billigs kleid find...

Mir hend die wuche e gschichtstest kha was abr au zimli eifach gsii will meh het immer choenne go froge was drmit gmeint isch und wenn oepis falsch gsii isch het sis gseit und meh hets choenne aendere...ah jo und mir hend no e englischtest kha abr mir hend dr test e tag vorher gmacht damit mir ungefaehr wuesse um was es goht abr am naechste tag ischs genau gliche nomol dra cho...naja mi stoerts nid ha zimli guetii note obwohl i nonig viel verstand...

am morge han i immer Learning lab und das isch so s gemuetlichste will ich muess nume d haelftii vo de husi zobe mache will i am morge immer no e stund ha zum alles fertig z mache...und negst semester han i sogar 2 stunde learninglab das beduetet gar keini husi meh^^

Mini eltere sind z mexiko gsii fuer 5 taeg und mini grosseltere hend uf uns ufpasst was no witzig gsii isch vorallem hend si mi ueberall hiigfahre und abgholt...ich glaub si sind froh wenn si wieder doerfe goo =P abr mir hend kartespieli gmacht so wie in alte ziite mit mim grossmami^^ und am sunntig bin i go bowling spiele mit de anderne ustuschschueler und es paarne vo doo...ich ha gwunne abr ich ha uf dr site so "stutzwaend" kha will ich kei ahnig kha han vom bowle...und huet han i gmerkt das mir d hand mega weh macht vom sunntig...

hmm am fritig isch s negste footballgame und mini  klei sister goht doert go cheerleade...will meh die wuche doerf go uebe und soo dorum goemmer wohrschinli an das spiel...

In dr schuel hemmer pics muesse mache fuer s yearbook und ich ha voll nid verstande was i muess mache und meh doerf nume eis mache und wenn das schlecht isch chuennt das halt eifach is yearbook und meh cha nid viel aendere...-.-

suscht isch eigentlich nid viel spannends passiert halt eifach schuel und soo...ah jo was au mega komisch isch, isch am samschtig obe eifach dahei z blibe und nuet mache was zwar die erste 3 wuche gemuetlich gsii isch abr langsam wirds bitz langwilig und ich ha scho fascht alli dvds gluegt ( sie hend e riiise sammlig an kinder und suscht dvds...) ich soett mir glaub mol kollege mit autos sueche...denn chan i au oefters weg...
haha das isch auu immer witzig wenn me ind autos luegt sitzt eifach sone 16 jaehrige dinne seht eifach mega komisch us...vorallem wenn si no so kleii sii=D

 

23.9.08 23:34, kommentieren

news...=)

Hallloo Chiiiinder
Also am fritig hemer e tornado warnig gha und mir heii alli in keller muesse wobii ichs gar nid gmerkt han...( ha grad mini hoor glettet will i es neus "glettiise" becho han wo meega guet isch^^) naja ich ha jedefalls dr fernseh a kha und ploetzlich isch dr bildschirm schwarz gsii und e stimm het mit mir gredet...irgendwenn isch denn mini schwester inne cho und het mi zum keller zoge und erklaert was grad passiert, abr mir hend nid lang muesse doert blibe abr mini kleinsti schwoester het mega angst becho und het gfunde si muess alli ihri plueschtierli i mis zimmer due damit si gschuetzt sind falls oepis passiert...
Zobe sind denn unseri nochbere zum barbecue uebere cho und die hend e sohn und de isch denn spoeter au no cho und het ca 8 kollege mitbrocht und die sind denn dr ganz obe i mim zimmer umeghockt und hend mi usgfrogt ueber d schwiiz usw...dr einti het sich i mim kleiderschrank igschlosse will er angst het vor em hund-.- naja isch no witzig gsii bis soo zimli alli us em zimmer sii user dr einti typ und mir hei ganz normal mitenander gredet und so und ploetzlich stoht mini gastmuetter mega gschockt im zimmer und frogt uns wurum mir ellei sii und was mir moeche und so wiiter...haha
aahh joo am samschtig simmer ind Mall gange das isch e riisigs shopping center genauu glich wie in brasilie omg es isch soooo toll gsii und s het so tolli kleider und vorallem mega billig naja ha denn mol alles agluegt und nuet kauft!! haha naja bis am schluss denn han i e taesche kauft und buecher fuer d schuel...bi mega stolz gsii uf mich, ich mein ich bi imene riesige shopping center gsii und ha buecher kauft!! hmm abr ha jo no laaang ziit zum go shoppe...xD
joo und am samschtig obe simmer zu fruende gange und hend film gluegt was nid wuerkli sehr intressant gsii isch, user ihres huus isch riiisig gsii und wunderschoen uund si hend e papagei gha, dem han i denn bitz duetsch biibrocht...

Am sunntig isch mi d sophia meega frueh cho wecke damit mir choenne wii game...mir hend denn gmerkt das ich es naturtalent bii und ha mega viel medallie gwunne und gestert han i nomol fast 2 stund gamed nach dr schuel es macht fast suechtig abr ich mein meh macht jo "sport" ^^
am suunntig obe isch mi mini district leiter cho abhole und mir sii zaeme go glace esse...si isch fuer mich zuestaendig falls ich problem ha und soo...joo si het mi mega viel sache gfrogt abr sisch recht witzig gsii obwohl ihres gastkind nid mitcho isch...ha e pretzel glace kha, das isch vanille mit caramel und bretzel stueckli dinne...ha natuerlich erst nochherd realisiert das pretzel= bretzel beduetet -.- was so zimli typisch isch...abr die esse do sowieso mega komischs zueg meh weiss nie richtig was i de sache dinne isch und si mische alles mit allem^^
 

Am mentig han i muesse vorsinge was i natuerli nid gwuesst han und vorallem han i die sache no nie glernt i dr schuel, s vorsinge isch jo no gange abr die handzeiche und blattsinge han ich no nie glernt...ich has glich ueberstande ha aber kei ahnig was fuer e note das i han will ich irgendwie mini note nid cha aluege im internet...
aach jaa da wer jo no dr homecomingball...also eigentlich han ich vor kha ellei doert ahne zgo odr ebbe mit kollege abr neii sone typ us minere englischklass het mich gfrogt oeb ich mit ihm doert ahne gang und ich ha gar nit recht ueberleit will ich sowieso immer jo sag wenn mich oeper oepis uf englisch frogt und jo jedefalls han ich jetzt es date mit dem was ich gar nid ha welle!! HIIILLFEE! joo ich muess jetzt no mit ihm go rede und ihm klar mache dass das nuet wird...^^

in dr schuel duend jetzt mega viel so lollis und suessigkeite verkaufe fuer d schuelreise und so und s beschte isch meh doerf i dr stund esse...dorum seht meh im moment alli mit emene lolli im muul...sisch recht witzig abr ebbe d lollis sind au bitz komisch vorallem sind sii riesig meh bechunnt se fast nid is muul und die sache wo die mische banane mit pfeffermuenz und so sache naaja ich ha e normale orange lolli gnoo und huet han i e pina colada lolli kha und denn heii alli gseit ich sig e alkii...das denke sowieso alli vo mir will me jo i dr schwiiz scho ab 16 alk doerf drinke und nid wie do mit 21 ( ihr lachet mich jetzt sicher us abr mini gasteltere froge mich immer ob i au ebitz wein will odr soo)
aber ebbe zrugg zum lolli es isch jo nume e lolli gsii wo so schmeckt wie pina colada das het nuet mit alkohol zdue!!

huet simmer im mc donalds gsii will mi gastvater nid dehei gsii isch ( er kocht immer fuer uns) und ha e happy meal kha hihi wobii i das esse nuem cha gseh wills das i dr mensa scho immer git...
morn zobe hemer e pizza party fuer alli ustuschschueler und uebermorn esse mir zmorge i dr schuel und mir muend uns wieder vorstelle das mir ustuschschueler sind und so wiiter...aah joo das isch au no witzig es hengt es riiise bild vo mir und em andere ustuschschueler im schulhuus und ich bi huet doert stoh blibe zum luege wien ich usseh und alli hend mega verwirrt gluegt und vergliche oeb ich das uf em bild bin^^ neii ich finds nid toll das es bild vo mir doert haengt wills es mega komischs bild vo mir isch...ich gang mol go froge oeb sis nid choenne wechsle apropoo foetelii morn gits piics fuer ins yearbook also vo dr ganze klass abr im oktober gits denn die pics wo me einzeln druf isch...=P
joo ich soett mol go lerne ha die wuche no 6 tests und soett no go huusii mache und und und...vermiss euch und wuensch euch e schoenii wuche...

17.9.08 22:50, kommentieren

witz des tages...-.-

witz des tages: ( vo minere englischlehrerin)

es git luet di sind trilingual, es git luet di sind bilingual und es git luet wo nume ei sproch choenne und das sind amerikaner...

ha huet e A+ im spanisch test zrugg becho=P

 

1 Kommentar 11.9.08 23:03, kommentieren

10/9/08

Haaallooo...

also s erste chor konzert isch guet gange...shet zimli viel luet kha die ganz mensa isch voll gsii und die isch viel viel viel groesser als unsrii...=)

nachdem i mi e wuche lang nume vo buechsefruecht zum z mittag ernaehrt han...hend si endlich mol oepis gwaechslet und ab jetzt gits bierchermuesli haha naja es isch glaub glich nid wuerkli gsund...wills zimli suess isch und so...abr immer no besser als pommes und chicken nuggets...

Glii isch homecomingball und im moment isch das e grosses thema vorallem wer jetzt homecomingking und queen wird usw.
(mi nochber isch nominiert worde, han en aber nonig gse...^^)

Ha jetzt Franzklass gwechslet und somit au englischklass...und s franz isch jetzt recht aspruchsvoll...abr sisch witzig und me het wenigstens oepis z due...
und d englischklass isch jetzt viel besser als die erstii vorallem d lehrerin isch besser und netter...(die alti englischlehrerin ignoriert mi jetzt...) naja bi jetzt mit dem typ i dr klass wo au an dr geburtstagsparty vo dr leah gsii isch...und er cha mi name immer nonig usspreche...das isch so zimli s schwierigste doo oeperem mi name bizbringe...si choenne eifach "Manu" nid sage s toent denn meistens wie Mano odr Meno odr so oepis und mi ganz name choennd si scho gar nid usspreche...was au luschtig isch ihne "chuchichaestli" z lerne^^ ( haha das cha de us duetschland au nid sage =))

am samschtig goemmer go shoppe ins shopping center xD
chauf mir wohrschinli e gitarre will i mini jo dahei gloo han und ich bruch unbedingt e jagge fuer e winter denn..abr im moment ischs no recht warm doo...
es isch voll abartig in dr schuel froge mi alli won i mini sache kauft ha und soo ( oeehm h&m?!) naaja isch no luschtig und sisch do voll nid normal das me luegt das d taesche au zu de kleider passt...bi huet au agsproche worde will ich jede tag e anderii taesche han und nid wie alli andere immer die glich^^ naja s muess halt zaeme passe und vorallem nid schwarz mit brun obwohl i das huet grad agha han =P i'm just kidding...

alli ustuschschueler sind zunere pizzaparty iglade worde, denn treffe mir no die andere ustueschschueler vo de anderne schuele...freu mii scho druf...dr fuessballlehrer a dr schuel het 12 johr lang in brasilie glebt und de chunnt denn immer und redet bitz mit mir^^

aahh jo in dr schuel hets e ruum nume fuer kopierer...und wenn me ufs wc will muess me immer so oepis i dr agende unterschribe looh...und es stoend immer so luet im gang wo kontrolliere oeb me z spoht isch odr so... -.-

ha die wuche scho 2 mol fascht verschlofe wills eifach z frueh isch...muess immer am viertel vor 7nii uf e bus und de isch mega ungmuetlich sone typische schuelbus halt...und de het denn au no so lang bis me mol i dr schuel isch...und sisch recht muehsam...und noch dr schuel chan i au nid blibe will dr bus grad fahrt und de fahrt nume eimol und mini gasteltere schaffe beidi d.h. si choenne mi au nid abhole...mol luege wien i das im november mach wenn i mit basketball afang...
aah joo die tisch wo me i dr schuel het sind au recht unpraktisch si sind mega klei und meh cha dr stuehl nid verstehle will  er jo am tisch agmacht isch und ich ha eifach z wenig platz uf dene...abr ich gwoehn mi langsam dra abr sisch recht schwer will ich jo suscht au immer alles verteil uf em tisch und do chame wuerkli nume s noetigste fuere neh...

naaja das wers glaub mol gsii...ich meld mii irgendwenn spoeter wieder...=D

 

 

1 Kommentar 10.9.08 23:21, kommentieren

First week in america

Ha die ersti wuche scho einigermasse ueberstande...und es chunnt mir vor als wer i scho ewigs doo...

Am Fritig hemer fruener us kha will i dr turnhalle no sone vorstellig gsii isch, doert het denn s schuelorchester gspielt und alli cheerleader hend zeigt was sii choenne ( isch wie im film und die sind wuerkli mega guet).
Zobe isch denn s Football game gsii was au no intressant gsii isch will ich dr sinn vo dem spiel nid wuerkli verstoh abr sisch luschtig gsii dene zuezluege wie si ufenander gumpe und so
noch em spiel hets no e afterparty geh wo aber eher die juengere gsii sind abr mir hei glich spass kha jedoch ischs am halb 11 scho fertig gsii will schiens oeper e schlaeggerei agfange het...?!

Gestert bin i amene geburtstagsfest gsii, was am afang zimli langwilig gsii isch abr denn han i gseh das si karaoke het und denn ischs zimli witzig gsii...und s het eine kha wo die ganz ziit froge gstellt het und gmeint het das me i dr schwiiz spanisch redet...naja er het vor es ustuschjohr in dr tuerkeii zmache^^
Ha am afang denkt er isch zimli komisch abr am endi vo dr party hemer eifach nur no drueber diskutiert was in shrek 2 und 3 passiert xD

Am mentig han i e test won i eigentlich am fritig kha het abr ich ha das nid gwuesst und dorum doerf en spoeter mache...chum zwar ueberhaupt nid drus, mir muend so woerter choenne erklaere abr ha im lexikon nochegluegt und die stoend gar nid dinne...?!

Mir sii go ikaufe und denn hemer fruecht kauft und womer daehei acho sind het mini klei schwoester e oepfel gno und gfrogt was das isch...haha abr sisch haerzig gsii..

 

1 Kommentar 7.9.08 18:50, kommentieren

Salat!

huet han i endlich dr salat in dr mensa gfunde^^ er isch abr schrecklich vorallem hets rohe brockoli und suscht sache dine wo nid ganz definierbar sind...abr immerhin besser als jede tag pizza...

jedes schuelzimmer het luutsprecher d.h me wird sicher 5 mol gstoert in dr stund will immer oepis wichtigs gmeldet wird wie z.b huet wer als homecoming king und quuen nominierd worde isch...genau glich wie i de film..

s guete isch das me scho am halb 3 us het abr drfuer het me nie pause und d mittagspause goht 25 minute und bis me mol s esse het gohts au recht lang...
und wills so viel schueler het, gits 5 mittagszite d.h es paar muend scho am 11 go esse anderi choennd erst spoeter go und me doerf nume um die ziit go wo me itreit isch...und nach dene 25 minute saege si wieder ueber d luutsprecher das mir wieder muend go und das die negste choenne cho...!?
zum zahle muess me nebe dr kasse e pin igeh so aehnlich wie mit ere kredit karte...und denn chunnt uf em pc s pic und dr name und alles ueber die person wo grad oepis kauf...

Mir hend huet e test kha und me het eifach d antworte choenne achruezle me muess also nid wuerkli ueberlegge sondern eher rote was richtig isch...

am fritig gang i an erst football match...=)

mir hend uns huet vor allne lehrer vo dr schuel muesse vorstalle und pics zeige vo family & friends...und bitz oepis ueber d schwiiz verzehle usw...
dr ander ustuschschueler isch au doert gsii und er chunnt us duetschland het abr zerscht gmeint ich choennt kei duetsch und het mit mir englisch gredet...jo bis ich ihm denn mol uf duetsch gantwortet ha was au komisch gsi isch ploetzlich wieder hochduetsch muesse z rede will i die meisti ziit jo english red odr schwiizerduetsch schrib...

Am mentig hemer s erste chorkonzert und ich ha genau mol 1 wuche ziit kha zum die lieder z lerne...weiss nid ob das wuerkli guet usechunnt...^^

1 Kommentar 3.9.08 23:24, kommentieren

Labory day- no school!

huet hemer freii will tag der arbeit isch...^^
bi trotzdem scho dr halb tag am huusi mache will i alles im lexikon muess nocheluege...

Gester simmer imene park gsii "worlds uf fun" isch aehnlich wie bi uns dr europa park nume sind d bahne viel besser d achterbahne sind riisig gsii und hend loops dine wo me die ganz zit uf em kopf isch usw...=)
es wunder isch gsii das mir nid schlecht worde isch nach de pancakes zum z morge mit ganz viel siirup...

Zobe hemer e Film obe gmacht wo si glaub jede monet mol moeche...d.h oeper vo dr familie doerf e film uswaehle wo me denn im fernseh cha kaufe...das mol han ich doerfe und mir hend superhero gluegt...^^

i dr schuel han i dr funpass becho das heisst ich cha jetzt au and american football match goo...was do zimli wichtig isch und es sind au alli zimli stolz uf ihri mannschaft und am tag vom spiel laufe vieli mit em t-shirt vo dr mannschaft ume...

 

1 Kommentar 1.9.08 20:21, kommentieren



Verantwortlich für die Inhalte ist der Autor. Dein kostenloses Blog bei myblog.de! Datenschutzerklärung
Werbung